近年極端天氣經常出現，一到打 9 號風球港鐵車站就好易逼爆。我喺鐵路小組會議上向港鐵提出兩個要求，希望未來一旦預告要掛 9 號風球，一定要提早做好以下兩點，減少市民不便：

1️⃣ 未上車嘅乘客： 月台必須有清晰指示同廣播，講明仲有幾耐改掛 9 號風球、呢班車嘅「終點站」究竟會去到邊，市民可以提早應變。

2️⃣ 已上車嘅乘客：車廂內要同步加強廣播，令市民可以早點知道終點站安排，諗定其他方法，例如喺沿途合適嘅車站轉乘其他仲營運緊嘅交通工具，分散人流，唔好全部湧去同一個轉車站。

另外，港鐵喺 32 個高風險車站出入口裝設咗水浸感應器。既然有咁嘅技術，我問港鐵呢啲感應器成本係點，如果唔貴，可唔可以喺全部車站裝晒，包括屯門、元朗區嘅輕鐵站。

港鐵回應，以安全為大前提，9 號波或更高信號生效時，重鐵露天段、輕鐵及港鐵巴士會暫停。但會盡量將行駛中嘅列車駛到原定終點或有商場連接嘅車站，並盡量開放車站及提供物資，亦會盡快通知乘客。關於水浸感應器，會根據風險評估不時檢討加裝。喺紅雨或黑雨期間，如果發現雨勢太大，甚至會作出「超前準備」，不排除提早關閉個別高風險車站以確保安全。

（筆者意見不代表本台立場）